الرئيسية / ع الماشي / ابلع جزمه !!

ابلع جزمه !!

Eating-shoesابلع جزمه ومتتكلمش .. ده منطق بعض الناس بحجة ان اللي بيتكلم او بينتقد عاوز يهدم الدوله وطبعا ده من مظاهر الخيانه العظمي والاخونه بالاضافه الي كوكتيل زي العسل من الاتهامات.

وياريت علي كده وبس .. يقعد يدعبس صبح وليل ويدور علي النماذج الفاشله في جميع انحاء العالم عشان يقعد يقول بص يا عم مش احنا بس اللي كده !!

اقرب مثال علي ذلك مثلا موضوع غرق المدن المصريه بسبب الامطار .. منزلين صور لمدن اوروبيه وامريكيه غرقانه عشان يقولك بص شوف آدي الدول المتقدمه حايسه بردو .. ومكلفش نفسه بس يعرف الدول اللي حصل عندها الكلام ده كان بسبب ايه .. هسهلهالك واقولك .. دي اعاصير وفياضانات وتسونامي يا كبير .. وطبعا ميخفاش علي حد ان دي بيبقي اسمها كوارث طبيعية .. كوارث .. اكررها تاني .. كوارث .. مش شوية امطار غزيره !!!! ..

انت عارف لو مصر اصابها اعصار لا قدر الله او اي حاجه من اللي انت فرحان بنشر صورها دي هيحصلك ايه .. كان زمانك دلوقتوا بتعمل بحث عن اسعار بدل الغطس واسطوانات الاكسجين ده لو لحقت اساسا !!

كلمه اخيره .. الفرق بينا وبينك ان احنا بنحب النجاح ونفسنا بلدنا تبقي احسن وبننتقد عشان نحفز الناس انها تكره الفشل وتضغط عشان الفشل والفساد ميستمرش .. لكن سعادتك الفشل عاجبك وبيدايقك النقد لمجرد انك عاوز ان وجهة نظرك بس تبقي صح ومعندكش ادني استعداد تبص بموضوعيه لاي حاجه حواليك .. احب ابشرك طول ما فيه الكتير من عينتك عمرنا مهنتقدم خطوه واحده لقدام .. خليك سعيد ومبسوط اوي واوعي ابدا تسيب الطبله اللي بتطبل بيها عشان لو سبتها ممكن يحصل حاجه .. ومتقلقش ابدا لما يحصلك مصيبه انت او حد من اهلك بسبب الفشل اللي انت قاعد تطبله صبح وليل .. ابقي سمعني صوتك بعدها !! …. نصيحه والله من قلبي ليك بلاش تتحمق اوي عشان في ناس اتخرب بيتها ومالها وحالها وفيه اللي حياته انتهت تماما فمالوش لازمه تفتح صدرك اوي كده وتتحمق من النقد عشان ميصيبكش دعوه منهم .

عن مصطفي عبدالوهاب

مصمم ومطور مواقع الإنترنت .. أهوي التدوين التقني والأدبي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *