المولد

2015112546لما تقري كتب التاريخ والسيره هيعجبك اوي مظاهر الاحتفال بمولد النبي عند الصحابه .. وعاوز تبحث عن ازاي كانو بيجهزوا من السنه للسنه اللي بعدها عشان الاحتفال ده .. كانوا بيعملوا كعكه كبيره جداا اللي احنا بنسميها دلوقتي “تورته” بس الاختلاف بقي انهم كانوا بيحطوا عليها زبيب !!!!

لو صدقت الهري اللي انا كاتبه تبقي اكيد في الطراوه لان اصلا مافيش حاجه اسمها مولد النبي ايام الرسول او حتي الصحابه نفسهم احتفلوا بيه وطبعا لا خلاف علي حب الصحابه لرسول الله يعني كان من الاولي نسمع عن حدوته واحده عن الاحتفال بالمولد ايامهم.

طبعا انت دلوقتي بتتهمني بالتخلف والرجعيه والتشدد وهتقولي يا عم ده احتفال والناس بتفرح ومتحبكهاش وهلم جره من الكلام ده .. هرد عليك واقولك : يا سيدي يعني انت شايف بقي الدول الاسلاميه هاريه العالم بالعلوم والابحاث والاختراعات والتعب والاجهاد مالي المسلمين من كتر التفاني والاخلاص في خدمة الدين والبشريه عشان دلوقتي بنتمحك في اي حاجه عشان نروح بيها علي نفسنا .. والا احنا بنحتفل بأي حاجه عشان ننسي ان احنا بقينا في ديل الأمم ؟؟ .. طب يا سيدي احتفل بس متلزقش احتفالاتك بالنبي وتخليهولي مناسبه اسلاميه .. اقلك .. انا اتخنقت منك اساسا .. ماهو اللي يحول شهر زي رمضان من شهر للصوم والعباده لشهر الاكل و المسلسلات مش صعب عليه يخترع اي احتفاليه عشان ياكل فيها شوية حلويات وبعد كده يحولها لمناسبه دينيه ..

اقلك حاجه احسن هتريحك مني .. انا رجعي ومتخلف ومتشدد .. سيبك انت .. عجبتك السمسميه ؟؟ 🙂

عن مصطفي عبدالوهاب

مصمم ومطور مواقع الإنترنت .. أهوي التدوين التقني والأدبي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *