زمن مالوش كبير !!

احنا عايشين في اوسخ زمن علي وجه الارض .
زمن الغش والنصب والكدب والمصالح .. زمن مالوش كبير او فيه حد ممكن يتقال عليه محترم .. زمن القرش ممكن يخلي اي حاجه ممكن تبقي مباحه .. زمن ممكن يخلي اللي من دمك يبيعك عشان شوية ملاليم .. زمن ممكن تلاقي الحقيقه فيه بقت كذب والكذب بقي حقيقه .. زمن الدين فيه بقي وسيله مصلحه وتدليس وتكفير .. زمن الوطنية فيه بقت بالمزايده والتخوين .. زمن يعلمك ازاي تبقي وسخ عشان تعرف تعيش .. زمن ريحته فاحت ونتنت والعفن جوا الناس تقدر توزنه بالكيلو .. زمن لو حاولت تعيش فيه محترم هتنداس بأقذر واحقر جزمه .. زمن لوعشت فيه خايف هتبقي نكره ولو حاربت هتبقي انت اللي مدان وممكن تبقي فيه ظالم ومفتري .. والمفتري فيه هو الكويس لان اللي حواليه شوية كلاب اتربوا علي انهم ميقدروش يعيشوا الا والكرباج ملفوف علي رقابهم .. زمن العدل فيه بقي اسطوره تقراها في الكتب والروايات .. التضحيه فيه بقت ملهاش تمن وممكن تتحول لسخريه .. الضمير بقي عباره عن كلمه ملهاش معني .. زمن لو عشت فيه محترم هيقولوا عليك كل حاجه عشان تبقي العكس لانهم اتربوا واتولدوا علي الوساخه فشيء طبيعي لو ملقوش وساخه فيك هيحاولوا يوسخوك معاهم .. زمن متستغربش فيه من اي حاجه .. زمن الضربه فيه ممكن تجيلك من اي حد .. بكرر .. من اي حد .. بكرر تاني .. من اي حد .. بكرر تالت .. من اي حد .. بكرر رابع .. من اي حد .. وتبقي اهبل وغبي لو استبعدت اي حد مهما كان
.. من الآخر ده زمن ماينفعش يتعاش فيه .. آخرك تتف عليه وكمان خساره عليه التفه .
– ملاحظه : مش آسف علي اي لفظ خارج لان دي اقل الفاظ تتناسب مع مقالب الزباله اللي عايشين وسطيها .
– ملاحظة 2 : مش عاجبك كلامي متحاولش تستفزني عشان الشخصيه القميئه اللي جوايا واللي بحاول اداريها هي اللي هترد عليك وبصراحه بقالي فتره عاوز الشخصيه دي نشوف النور شويه وتتولي قيادة شخصيتي وبالمره اركن الشخصيه المحترمه او اطلعها علي المعاش عشان كفايه عليها كده .