الرئيسية / ع الماشي / مش مجرد شعار !

مش مجرد شعار !

جربت قبل كده تكلم واحد ميت ؟؟ .. طبعا هتقول عليا مجنون .. لكن الحقيقه فعلا ان احنا بنكلم ناس اموات .. عارف مين ؟؟ .. هقولك .. كل واحد واخد شعار تحيا مصر تحت باطه وسادد ودانه وعنيه عن كل حاجه .. بيقنع نفسه انه عايش في حرب في حين اغلب المعارضين في السجون دلوقتي .. كل واحد شايف البلد بتخرب فعليا وبرده عامل فيها من بنها وبيبرر بكل الطرق الفشل مع انه هو نفس الشخص الي مكنش صابر علي الرئيس اللي قابله .. وهو هو اللي بيردد نفس مبررات الاخوان لفشل حكمهم بس الفرق انه بيقول المبررات دي للرئيس التاني علي الرغم من انه كان ضد مبرراته نفسها قبل كده .. وهو هو اللي شايف انجازات عباره عن حبر علي ورق واغلبها كدب في كدب وبيحاول يقنعني بالوهم اللي هو اساسا مش حاسس بيه .. وهو هو اللي مصر يتهم اي واحد مختلف معاه انه بيخرب وخاين للبلد ..
– ملحوظه : شعار تحيا مصر ده مش مجرد جمله بنرددها في الفاضيه والمليانه .. ده حاجه بتتحفر جوه كل مصري من ساعة مابيتولد بيبقي عايش بيه وقلبه بيتحرق في كل لحظة كل مابيشوف بلده بتضيع قدام عنيه وبلاد تانيه بتقف علي رجليها وعايشه اوضاع اسوأ مننا بمراحل .. لكن للأسف خليتوا الشعار ده عباره عن كلمه مزايدة تافه زي عقولكم عشان تتاجروا علي الناس وتثبتوا كراسيكم واللي عناوين الفشل في اعمالكم اللي هتوقعكم بإذن الله .. وصدق اشرف الخلق حين قال ( من اعمالكم سلط عليكم )

عن مصطفي عبدالوهاب

مصمم ومطور مواقع الإنترنت .. أهوي التدوين التقني والأدبي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *